الشاعر محمود جمعه وقصيدة بعنوان “شاعر “

كان عظيم
بس كان بيحب يكدب
يكتب الشعر اللى بيشدك و يجذب
كان جميل البسمة
و شه .. يضحك فى المقابلة
لو يشوف الوش عابس
قبل ما تفكر يسابقك:
قولى قابلة
تشرب أيه
شاي و حلبة
و لا بتحب اللاتيه
يللا قولى
و يللا أحكى
كان بيسمع كل حرف
بحب جارف
و اما ينصح
نُصح عارف
كان يبشر
عمره مرة فى يوم ما كشر
لما كان يزعل يغنى
و اما كان يفرح بيكدب
يكتب الشعر الى بيشدك و يجذب

كان .. ده شاعر
دنيته كانت مشاعر
و اما فارق يوم شارعنا
البيبان قفلت ضلفها
و العيال شبت و شابت
و العجوز ع البسطة ساكتة
و اما صلت
و اما قالت
قالت الشعر اللى يجذب
رغم أنه كان بيكذب