غريق ع البحر

بقلم/ علاء الدين علي

يا قلب البحر

ليه تغدر وتاخد روح؟

ونبضك موت

بيرك يسحب الماشي على شطك

ولو سباح ميقدرشي

يحوش الشرقة ويسلم

ويستسلم غريق ع البر

وضخ الموج نقول مدك

ومد القلب إسمه الضغط

نعالج ضغطك العالي

بإيه إنطق

بقينا رديم سيول ياما

ولما تدوخ ف دوامة

ليه مبتصعبش ع الغرقان

ورغم دا كله نشكيلك

وتسمعنا

ولما شكينا أحوالك

وجه ردك علينا يقول

دا ذنب المية مش ذنبي

خريرها صوت وله معنى

ولو تسمعها هتقولك

أنا هادية ونواتي

لريح مجنون

وموجي عنيف

من الماشي على سطحي

وسيلي ضيافة للأمطار

وطرطشتي من الإنسان

بابلع طوب

واطرطش غيظ على الحادف

غضب عصيان

أنا شكل الكيان للبحر

أنا اللي ف عشقي داب الملح

أنا البلسم لفطر الجلد

عرفت أطرد بعزمي السم

ف ليه تحدفني بالطوبة

وأنا شايلة عشانك زاد