انا كان لي صوت

بقلم الشاعر / علي ابو المجد

أنا كان لي صوت ؛؛
و عيون ؛؛
و ناس ؛؛
و بلاد بتستنى النهار الجي
أنا كنت حي
ماعرفش إيه ؟!!
حولني : قالب طوب
فوقي جدع معطوب
نفض هدومه ؛و سابني متعفر

عشرين سنة ؛و تسعة ..
بايعني الخوف
عشرين سنة : شايف ؛؛
و تسعة : لسه قادر اشوف
ب الكف ؛؛
و الريق ؛؛
و الودان الصاحية من بدري
شميت دموع الناس ..
على : خد الطريق
فات من هنا قبلي
عيل ف إيده السنبلات الخضر
هيفوت هنا بعدي
عيل ف روحه الأمنيات يابسه
يا قلبي ملس ع السكك ؛؛
و اكسر ضلوعي .. ؛و هج
اللي اتخلق له جناح ..
ب يموت : من الحبسة