بيت مهجور

.بقلم الشاعر/ حاتم مرعي
بابي خشب مكسور
وبواباتـِك نور
بس سقفِك واطي
أنا باسأل العاطي
يمنحِك صبر ناعسه
يامُ العيون ناعسه
سهران فى دنيا
ولا فى الحـِنه
ولا مابينا
فنار مطفي
وبيت مهجور ..
-رشيني مايه بملح
إقري فى أركاني
ماتيسر
من آيات الفرح
سيبيني أتمنى
جايز القاني
قصر ف الجنه
طوبه من فضه
وطوبه دهب
وطوبى لمن
حظه انكتب
على حجر بحر
مرجاني ..
سمي وخطيني
سميني من تاني
اسمي القديم
مابقاش على أدي
ماعدشي يشبهني
سميني اسم يادوب
مايكفنيش الشهر
سميني اسم يدوب
بعد النِدا
زي إبتسامة طفل
من غير صدا
وهاتي من روحك نفَس
يحيِني ..