ظنك ايه

بقلم الأديب / خالد الجمال 
يا بنت الليل
عيونك تضحك مرة وتبكى
دبلت فية معانى كتيرة
وبقيتى سيرة . سيرة وسيرة
خوفت لقلبي لحظة يميل
وأبقي أسير الفهم الغامض
راضي بحالي
وليه اتحدى بكرة وبعده
هو إمبارح وفي بوعده .؟
ظنك إيه
أحكى حكايتك في الحكايات
وارضي أكون من الاموات
لما الميت فضى حروفه
وموت خوفه
بأي لسان هيدافع عنك
روحه بتصرخ علي أعتابك
وأنت يا قادرة فايتة الصرخة
تلم حروف كل الحكايات
وتبقا سراب الوهم الساكن
جوة قلوب ملهاش بديات
ظنك إيه
تلعبي بية وألعب بيكى
لعبة جديدة أول مرة تمر علية
وتبقى الآمرة فيها وناهية
أمرك نافد غصب عنى
كل ما اغمض عينى ألقاكى
فاتحة عنيكى تبصي علية
ظنك إيه تبقي الباقية
ما هو أنت الباقية
وأنا متلصم فيكى بعافر
قبل ما يجى يوم وأسافر
أسافر منك منك ليكى
وأنا ممدود البال وبخاطر
ظنك إيه
تعشقي قلبى وأعشق قلبك
كل كلام العشق باعوه
قتلوا الحب لمل خانوه
مسحوا الماضى يوم و نافوه
واللي يحب الحب عادوه
ظنك إيه
هو أنا عايش في المخصوص
أمد الإيد وأعبي فلوس
دا أنا مش لاقي اللقمة الناشفة
أقدمهالك تحيني بيها
وتلمينى تحت جناحك المكسور
ظنك إيه
أصرخ وأثور
عمر الظن ما كان في محله
واللي يحله عاش مجنون
ظنك ايه
….