التنوير – eltanwer ثقافه وفنون
بقلم الشاعر / علاء الدين علي
أعداد في تاريخ
*******
في سلوك الناس
عقلية كهل وقلب رضيع
يبعيش أراجوز
إستخدم عقله عشان يرضي
كل الرواد
كان فاكر إته بيسعدهم
والضحكة المرسومة ف عينهم
من فرحة إتزرعت جواهم
علشان فاهمين
لكن هيهات
والعكس ف قلب من الدنيا
إسود كما لون
الفحم الجاهز للتوليع
والعقل مفيش
أو فيه وإتحجر من جبروت
بيطبطب دايما ع الاكتاف
بيمين وسمال ماسكة الخنجر
وبيهري الكبد وفلزاته
بتموت م القهر
ويقول للخلق إنه إتأثر
من طعنة غدر
ومابين الإتنين واحد عايش
متوسط عفله وإحساسه
بيحلل تحت الميكرسكوب
وبيسأل دايما وسؤاله محور لجدال
الفايدة العايدة على الأراجوز
لو حب يريح كل الناس
أو نقط الماية ف الفيضان
هتبل شطوط
ويحاول متوسط عقله
لو جرب مرة يعيش الاتنين
وإن عاش ف الدور
الطرف التاني بيستأصل
الثفة جواه
ويعيش منبوذ
ويحاول يرجع لكيانه
بيجيله فصام
مقسوم القلب على النصين
وبيبقى كيان الخير والشر
واخير بيسلم بالمكتوب
وبيبني الحيط
ونموذج واحد يتكرر عبر الأزمان
معروف الطاعن والخنجر
والطعنة كمان
أما المطعون مالهوش سيرة
فالدنيا دي غير
أعداد مكتوبة في التواريخ
