قميص ماكبرش

بقلم الشاعر / علي ابو المجد

بيبيونة بمبي فوق قميص كاروهات
علبة بلاستيك فيها قطن ؛و فول
مين اللي نايم ملو روحه : جمال
عيل صغير !! ..
ولا ده تمثال
قالوا المدارس عين على المجهول
لكن ما شفتش / غير : وطن شيال

بيبيونة بمبي فوق قميص ما كبرش
ساعة سنان أختي : ما بتأخرش
لونت بذر اليوستافندي : عقد ل الأبلة
ليه تشنقوا بيه ..
بعد مني : جيل من الأطفال
شابت .. و لسه ب تلعب الحجلة

بيبيونة بمبي فوق قميص عريان
جني ؛و زيبق .. حبلي ما بيفلتش
خانتني وردة ..
بعتها ب بستان
و مشيت جمل / يا صبر يا جمال
عيل ..
و ف الدنيا دي ياما عيال
غير ع البراءة : روحها ما اتفتلتش

قالوا النهار
قلت الضحى : أوضح
لو كل عاشق ب اللي فيه ينضح
تلقوا الهوى / و الحب طبع جميل
و الدنيا كانت : ترضى ل الأجيال

سبلت عين الشمس ليه يا ليل ؟!!
دي بس نايمة / لسة ما تقتلتش