“اناشيد النخيل “للشاعر محمود جمعة فى ذكرى اكتوبر .التنوير-eltanwer

عرق البلح دمع النخيل فى السر
عمر النخيل ما اشتكى للناس
و لاعمره دمعه انكشف إلا لفارس حر
بس النخيل اللى وقف للعاصفة و الريح
رقص جريده للعواصف رقصة الشهداء
إن مال يميل للمحبة
و يقيم عيدانه سيوف تلمع فى شمس الظهر
عمر النخيل مابكى إلا و الجميع نيام
بكى البشتلى اللى صلى آخر ركعة فى الجنة
و بكى الصاروخ اللى سقط فى صينية الحنة
بكى أبو هاشم و ابراهيم على أول الشارع
و بكى غريب الغريب .. و الغريب جامع
و أنا اللى صليت على النخل الشهيد غيباَ
و رجعت أشرب عرق فى زمان العهر
شربت عرق البلح دمع النخيل الحر

حرقة بكا النخل بكاه على المجهول
دعانى زرت قبور معرفش سكانها
طيب جريد فرشها و النخل بستانها
يبكى يسيل العرق خمرة من الجنة
يحبل و يطرح بلح و البطن بطن بتول
و يقولى أغلى بلح فى الكون بلح مجهول
و أنا الجهول اللى طالع نخلتى عريان
مهما شربت العرق ما يصيبنى داء السكر
أكمن عرق البلح دمع النخيل الحر

#البشتلى : الشهيد البطل سعيد البشتلى
#ابو هاشم: الشهيد البطل مصطفى ابو هاشم
#ابراهيم: الشهيد البطل ابراهيم سليمان
#غريب: شيخ الفدائيين غريب محمد