“يادى الزمان ” من روائع عبد الرحمن الأبنودى

يادي الزمان
ليك مناجل في القلوب حاشة
نضحك وضحكتنا باهتة
والنفوس هاشة
ده الكدب وسط الخلايق ماشي بيتمشى

يا جابر الكسر مال الكسر مش مجبور
والدنيا جاية علي زي الرياح هوجه
بتصحبك الدنيا صدقتها يا مغرور
والفرحه دايما تضيع والحزن له عوده
ياعم لا تصدق الأيام بكرة تدور
ده السبع ساعة القدر تموته دودة

اوعوا تلوموا الحزين يا ناس على همومه
حزن اللي ما حزنش يوم يا خلق من يومه

والليل قليل الأصل ملهوش في المعروف
وكل ليله بفصل وكل ساعه بخوف
دايما مخبي في جيبه نصل
يطعنش غير في الجوف
دايما قليل الأصل بينكر المعروف

اوعوا تلوموا الحزين يا ناس على همومه
حزن اللي ما حزنش يوم يا خلق من يومه

لا دار ولا ولاد ولا خليل ولا خي
والحزن زاد ما زاد ولا يسوى عندي شيء
زمني خلاص اعتاد يرمي حموله على
تحرم يا طعم الزاد وشربتين المي

اوعوا تلوموا الحزين يا ناس على همومه
حزن اللي ما حزنش يوم يا خلق من يوم

عبدالرحمن الابنودي